అమెరికాను తీవ్రంగా హెచ్చరించిన ఉత్తరకొరియా పార్లమెంటరీ కమిటీ!

'ఉత్తరకొరియాపై యుద్ధం మొదలు పెట్టాం, అన్ని దేశాలు మద్దతు పలకాలి' అంటూ అమెరికా అధ్యక్షుడు డొనాల్డ్ ట్రంప్ అన్ని దేశాలకు ఓపెన్ లెటర్ రాశారని ఉత్తరకొరియా పార్లమెంటరీ కమిటీ ఆరోపించింది. ఆదివారమే ఆ లేఖలు ఆయాదేశాల పార్లమెంట్లకు చేరాయని తెలిపింది. ఉత్తరకొరియాపై తీవ్రమైన కక్ష పెంచుకున్న ట్రంప్ ఈ రకమైన వేధింపులకు పాల్పడుతున్నారని ఉత్తరకొరియా ఆరోపించింది.

ఈ మేరకు ప్రపంచ దేశాల పార్లమెంట్లకు ఉత్తరకొరియా లేఖలు రాసింది. ఈ లేఖల్లో...తాజాగా జరిగిన ఐక్యరాజ్యసమితి సెక్యూరిటీ కౌన్సిల్ లో ట్రంప్ మాట్లాడుతూ, ఉత్తరకొరియాను సర్వనాశనం చేస్తానని ప్రతిజ్ఞ చేశారని గుర్తుచేసింది. దానిని నిజం చేసేందుకు ట్రంప్ నడుంబిగించారని ఆరోపించింది. అయితే తాము అమెరికాకు తలవంచమని ఆ లేఖల్లో స్పష్టం చేసింది. తమపై దాడికి దిగితే అమెరికా తమ హైడ్రోజన్ బాంబు దెబ్బ రుచిచూస్తుందని తీవ్రంగా హెచ్చరించింది.